Ermənistan parlamentində qalmaqallı müzakirə | “Bəs onlar niyə araşdırılmır?”

“Dövlət çevrilişi ittihamı ilə həbs edilən şəxs öz əməllərini “terrorçuluq” adlandırıb”.

Ermənistan mediası xəbər verir ki, bunu Ermənistan İstintaq Komitəsinin sədri Artur Poqosyan parlamentdə büdcə müzakirələri zamanı müxalif deputat Anna Qriqoryanın suallarını cavablandırarkən bəyan edib.

A.Qriqoryan bildirib ki, həbs edilənləri arxiyepiskop Baqrat Qalstanyanın telefon danışıqlarının dinlənilməsi zamanı üzə çıxarılan “iki-üç nəfərin öldürülməsinin vacibliyi” barədə sözləri əsasında süni şəkildə dövlət çevrilişinə cəhddə ittiham etməyə çalışırlar.

O, “siz vəzifəli bir şəxs kimi tam məlumatlı olduğunuz halda cəmiyyəti qorxutmaq üçün yalnız bu cümləni seçmisiniz... Elə bil insanlar, filmlərdə olduğu kimi, bütün planlarını lövhədə yazıblar. Əgər belə faktlar varsa, niyə onlar açıqlanmır?”, – deyə vurğulayıb.

Bunun cavabında A.Poqosyan öncə “dinləmə” ifadəsi ilə razılaşmadığını, daha sonra fakt araşdırılarkən dinləmənin olmadığını bildirib, lakin söhbətin yazısının necə əldə edildiyini də açıqlamayıb.

A.Poqosyan qeyd edib ki, artıq bu sözlərin elə-belə deyilmədiyi barədə sübutlar var. Axtarış zamanı tapılan və fəaliyyət planı ehtimal edilən sənəddə birbaşa “terror” sözü yazılıb. Söhbət binaların ələ keçirilməsindən gedib.

“İstintaq başa çatmayana qədər irəli getmək istəmirəm, lakin açıq məhkəmə prosesində hər şeydən özünüz əmin olacaqsınız”, – deyə A.Poqosyan fikrini tamamlayıb.