Ermənistan və Avropol saziş imzaladı | Sazişin əsas məqsədi nədir?

Ermənistan və Avropa İttifaqının Hüquq Mühafizəsi sahəsi üzrə Əməkdaşlıq Agentliyi olan Avropol hüquq-mühafizə orqanları sahəsində əməkdaşlığı gücləndirəcək və İrəvan bu strukturda əlaqələndirici şəxs təyin edəcək.

Bu sözləri Ermənistan daxili işlər nazirinin müavini Arpine Sarkisyan parlamentin müdafiə və təhlükəsizlik üzrə komissiyasının iclasında Ermənistan nazirliyi ilə Avropol arasında imzalanmış sazişi təqdim edərkən deyib.

O bildirib ki, saziş transmilli cinayətlər, xüsusilə narkotiklərin qanunsuz dövriyyəsi, əmlakın qeyri-qanuni mənimsənilməsi, kibercinayətlər, çirkli pulların yuyulması, insan alveri və digər sahələrdə əməkdaşlığın genişləndirilməsinə yönəlib.

Sənəd çərçivəsində Ermənistan Avropolda əlaqələndirici zabit təyin edəcək. Həmin təmsilçinin Niderlandda iqamətgahı və Avropolun məxfi məlumat bazasına çıxış imkanı olacaq. Zabit Ermənistan və Avropa İttifaqı hüquq-mühafizə orqanları arasında daimi dialoqu təmin edəcək.