Ermənistan yaralıların sayını gizlədir

Ermənistan-Azərbaycan şərti sərhədində baş verən silahlı toqquşma nəticəsində yaralanan erməni hərbçilərinin sayı artıb.

Bu barədə Ermənistan Müdafiə Nazirliyi məlumat yayıb. Bildirilib ki, onlardan birinin vəziyyəti ağırdır.

Qeyd edək ki, bundan əvvəl Ermənistan Müdafiə Nazirliyi silahlı toqquşma zamanı 4 hərbçisinin yaralandığını bildirmişdi. Məsələnin əsas məqamı isə ondan ibarətdir ki, rəsmi İrəvan hər dəfə olduğu kimi itkilərinin dəqiq sayını gizlətməyə çalışır. Əslində isə həqiqət budur ki, mayın 12-də açıqlanan rəqəmlər də mayın 11-də baş verən silahlı toqquşma nəticəsində yaralananlara aiddir.

Ölkənin Müdafiə Nazirliyinin yaralı sayını az göstərməsinə və hissə-hissə açıqlamasına baxmayaraq, sosial şəbəkələrdə itkilərin də olduğu barədə məlumat yayılıb. Hətta Yerablur qəbiristanlığında yeni məzarların qazıldığı iddia edilir.