Ermənistanın Baş Qərargah rəisi dövlət sirrindən danışdı

“Ermənistanın Kollektiv Təhlükəsizlik Müqaviləsi Təşkilatından çıxmasının nəticələri ilə bağlı məlumatlar tamamilə məxfidir”.

Bunu “Yerablur” hərbi panteonunda keçirilən brifinqdə Ermənistan Silahlı Qüvvələrinin Baş Qərargah rəisi Edvard Asryan deyib.

O bildirib ki, ölkəsi hələ KTMT-ni tərk etməyib və təşkilatdan çıxmağın nə ilə nəticələnəcəyi dövlət sirridir.

Jurnalistin KTMT daxilində birgə strukturların mövcudluğu ilə bağlı sualının cavabında isə E.Asryan deyib ki, bu strukturlar ancaq kağız üzərində mövcuddur.

Xatırladaq ki, Ermənistanın Baş naziri Nikol Paşinyan fevralın 22-də “France 24” telekanalına müsahibəsində ölkəsinin KTMT-də iştirakını “dondurduğunu” açıqlayıb. Lakin sonradan Kreml bununla bağlı İrəvandan heç bir rəsmi bildirişin daxil olmadığını qeyd edib.

Bununla belə, fevralın 28-də parlamentdə çıxış edən Nikol Paşinyan vurğulayıb ki, KTMT təhlükəsizliklə bağlı öhdəliklərini yerinə yetirməməkdə davam edərsə, Ermənistan üzvlüyünü de-yure donduracaq.