FIFA prezidenti İran millisinin dünya çempionatında iştirak etməsi üçün çalışır - Baku TV

FIFA-nın prezidenti Canni İnfantino İran yığmasının 2026-cı il dünya çempionatında iştirakı ətrafında ABŞ və İslam Respublikası arasındakı fikir ayrılıqlarını həll etmək üçün səylər göstərir. Bu barədə "Politico" nəşri yazıb.

İslamabadda Vaşinqton və Tehran arasında sülh danışıqlarının pozulmasından sonra dünya futbolunun rəhbəri hər iki tərəflə şəxsi əlaqələrini aktivləşdirib.

İnfantino oyunlarını ABŞ ərazisində keçirmək istəməyən İranla Amerika tərəfi arasında kompromis tapmağa çalışır.

Xatırladaq ki, İran yığması Şimali Amerikada keçiriləcək mundiala vəsiqəni ilk qazananlardan biri olub. Lakin bir ay əvvəl ABŞ-nin İrana qarşı hərbi əməliyyatlara başlamasından sonra Tehranda milli komandanın turnirdə iştirakı getdikcə daha çox şübhə altına alınıb.

İranın gənclər və idman naziri Los-Anceles və Sietldə planlaşdırılan matçların Meksika ərazisinə keçirilməsini tələb edib. FIFA bu həftə həmin xahişi rədd edib.

Adı açıqlanmayan Şimali Amerika futbol rəsmisinin sözlərinə görə, İnfantinonun qarşısında iki məsələni həll etmək durur. Birincisi, ABŞ Prezidenti Donald Trampı İranın Amerika ərazisindəki matçlarda iştirakının yolverilən olduğuna inandırmaqdır. İkincisi isə İran tərəfinin bu cür şərtlərlə razılaşmasına nail olmaqdır.

Qeyd edək ki, hazırkı vəziyyət son illər Amerika rəhbərliyi ilə ardıcıl olaraq sıx əlaqələr quran FIFA rəhbəri üçün ən ciddi geosiyasi çağırışlardan birinə çevrilib. Mənbələrin qeyd etdiyinə görə, təşkilat daxilində bu cür yanaşma FIFA-nın ali rəhbərliyinin nümayəndələri arasında birmənalı olmayan reaksiya doğurur.