Fransa Ukraynaya silah verməkdən boyun qaçırır?

Fransa Prezidenti Emmanuel Makron Ukraynaya getməkdən imtina edib.

Yerli kütləvi informasiya vasitələrinin yaydığı məlumata görə, fevralın 13-14-nə planlaşdırılan səfər təhlükəsizlik məsələlərinə görə baş tutmayıb.

Qeyd edək ki, Zelenski ilə görüşdə ikitərəfli təhlükəsizlik zəmanətləri haqqında saziş imzalanmalı idi. Müqavilədə Ukraynaya daha müasir silahlar, o cümlədən uzaqmənzilli qanadlı raketlərin verilməsi nəzərdə tutulurdu. Rəsmi Kiyev isə Parisdən 12 “Mirage 2000D” hücum təyyarəsi istəyib.

Yerli mediada o da bildirilib ki, Makronun səfəri təxirə salması həm də Fransanın sözügedən avadanlıqların transferinə zəmanət verə bilməməsi ilə də əlaqəli olub.

Fransa liderinin Kiyevə getməkdən imtina etməsi ilə bağlı ekspertlər də bir neçə ehtimal irəli sürüblər. Onlar arasında liderin Ukraynanın yenidənqurma proqramına fransız biznesini cəlb etmək cəhdinin olması da var. İddiaya görə, Ukraynanın gündəmi daraltması Makronu qane etməyib.

Daha bir ehtimalda isə rəsmi Kiyevin Fransa Hərbi Hava Qüvvələri ilə heç bir razılaşmasının olmaması əsas göstərilib. Belə ki, “Mirage 2000D” Rusiyanın “Su-35” qırıcıları ilə toqquşmada vurula bilər.

Bununla yanaşı, bu tip təyyarələrin Rusiyanın hava hücumundan müdafiə sistemlərini, o cümlədən “Pantsir” kimi mobil platformalarını üstələyə bilib-bilməyəcəyi də sual altındadır.

Eyni zamanda, sözügedən hücum təyyarələrinin Ukraynada istifadə üçün kadr çatışmazlığı var. Bu o deməkdir ki, rəsmi Kiyev Fransada texniki mütəxəssislər tapmalı, ehtiyat hissələrinin tədarükü üçün logistika və təmir bazası qurmalı olacaq. Bu isə Fransanın birbaşa Rusiya ilə münaqişəyə sürüklənməsi ilə nəticələnə bilər.

Ekspertlərin fikrincə, sövdələşməni maliyyələşdirməyi öz üzərinə götürməkdən çəkinən rəsmi Paris bu məsələni Sülh Fondunun həll etməsini istəyir. Hətta sözügedən məsələ ilə bağlı Fransanın Brüssellə fikir ayrılığının olduğu da ehtimal olunur.