Fransa və Rusiya münasibətləri daha da gərginləşir | Zaxarovadan sərt açıqlama

Rusiya Xarici İşlər Nazirliyinin əməkdaşı Paris hava limanında saxlanılıb. Onun telefonu və kompüteri götürülüb.

Rusiya XİN-in rəsmi nümayəndəsi Mariya Zaxarova brifinqdə bildirib ki, aprelin 6-da Şarl de Qoll Hava Limanında baş verənləri izah etmək mümkün deyil.

"Həyata keçirilən demarşlar nəticəsində həmkarımızın ölkəyə girişinə icazə verilib, lakin o, bir gün hava limanının sərhəd zonasında qalmalı olub", ‒ deyə rusiyalı diplomat vurğulayıb.

Hadisədən sonra Fransa səfiri Rusiya Xarici İşlər Nazirliyinə çağırılıb, Fransaya etiraz notası verilib.

"Moskva Paris hava limanında Rusiya XİN əməkdaşının saxlanılmasını pisləyir, bu, diplomatlara qarşı yolverilməz hərəkətdir".

Bunu isə Rusiya Prezidentinin mətbuat katibi Dmitri Peskov bildirib.

"Bu, tamamilə yolverilməz hərəkətlərdir, onlar Fransanın Vyana Konvensiyası çərçivəsində bütün öhdəliklərinə ziddir. Parisdəki konsulluq xidmətimizin nümayəndələri uzun müddət ərzində buraxılmayıb. Əlbəttə, bu, Fransa hakimiyyəti tərəfindən artıq korlanmış ikitərəfli münasibətlərimizi daha da pisləşdirir", ‒ deyə Kreml nümayəndəsi qeyd edib.