Fransada minlərlə şagird təhlükəli binalarda təhsil alır

Fransada yeni tədris ili bir sıra problemlərlə müşayiət olunub.

Ekoloji və sosial təşkilatların, eləcə də “Greenpeace”, “Oxfam”, “CGT Éducation” və “Snes-FSU” həmkarlar ittifaqlarının yayımladığı birgə hesabatda bildirilib ki, ölkədəki məktəb binalarının 20-30%-i qəzalı vəziyyətdədir və ekstremal iqlim şəraitinə uyğun deyil.

Sənəddə təhsil ocaqlarında qışda soyuqların, yayda isə dözülməz istilərin hökm sürdüyü, hətta bəzi məktəblərdə sinif otaqlarının tavanlarından suyun damdığı qeyd olunub. Belə şəraitdə nə müəllimlərin, nə də şagirdlərin sağlam və effektiv təhsil alması mümkün deyil.

Mütəxəssislərin sözlərinə görə, 2025-ci il iyul ayının əvvəlində baş verən isti hava dalğası nəticəsində 2 mindən çox təhsil müəssisəsi, əsasən ibtidai məktəblər müvəqqəti olaraq fəaliyyətini dayandırmalı olub. Bu, məktəblərin iqlim dəyişikliyinə qarşı hazırlıqsız olduğunu bir daha göstərdi.

Ekspertlər yaranmış biabırçı vəziyyətin tez bir zamanda həll edilməsi üçün dövlətin təcili hərəkətə keçməsini tələb ediblər.