G20 ölkələri Çinin "Bir kəmər, bir yol" layihəsinə rəqib yaradır

ABŞ, Hindistan, Səudiyyə Ərəbistanı, Avropa Birliyi yeni nəqliyyat dəhlizi ilə bağlı razılaşmaya gəliblər.

Yeni Dehlidə keçirilən G20 sammiti çərçivəsində dünya liderləri Yaxın Şərq və Cənubi Asiyanı birləşdirən dəmir yolları və limanların tikintisinə dair sazişi elan ediblər.

Razılaşma ABŞ Prezidenti Cozef Baydenin Çinin “Bir kəmər və bir yol” qlobal infrastruktur layihəsinə qarşı durmağa çalışdığı bir vaxta təsadüf edir.

Baydenin sözlərinə görə, layihə ekoloji təmiz enerji sahəsində sonsuz imkanlar açacaq, həmçinin müxtəlif regionlar arasında yeni kommunikasiyaların qurulmasına imkan verəcək.

Ağ Evin bəyanatında deyilir ki, layihə elektrik enerjisinə etibarlı çıxışı genişləndirmək üçün sualtı kabellərin çəkilməsi, elektrik şəbəkələrinin və telekommunikasiya xətlərinin birləşdirilməsini nəzərdə tutur.

ABŞ rəsmilərinin fikrincə, təşəbbüs Hindistan, Yaxın Şərq və Avropanı birləşdirən yeni nəqliyyat dəhlizi yaradacaq. Sazişin regionun aşağı və orta gəlirli ölkələrinə fayda verəcəyi və Yaxın Şərqin dünya ticarətindəki rolunu artıracağı vurğulanır.