Gedin onları ovlayın | Keçmiş nazir erməniləri Paşinyana qarşı boykota çağırdı

“Ermənistanda indiki formada tətbiq edilən universal bəyannamə sistemi iqtisadi inkişaf və ya vətəndaşların həyat səviyyəsinin yaxşılaşmasına olan ümidlər kontekstində faydasızdır.

Ona görə də ümumi boykota getmək və bəyannamələrin məcburi təqdim edilməsinin ləğvinə nail olmaq lazımdır”.

Bu fikirləri “Həyat üçün ölkə” Partiyasının həmtəsisçisi, keçmiş əmək və sosial məsələlər naziri Mesrop Arakelyan deyib.

Ermənistanın Baş naziri Nikol Paşinyan yanvarın 31-də keçirdiyi mətbuat konfransında bildirib ki, 2024-cü il üçün gəlir vergisi bəyannaməsinin təqdim edilməsi üçün son müddət 2025-ci il mayın 1-dən noyabrın 1-nə köçürülüb.

“Ermənistan hakimiyyəti beynəlxalq təcrübəyə istinad edir, lakin onların təbliğ etdikləri universal bəyannamə sistemi əksər ölkələrdə qəbul edilən modeldən xeyli fərqlənir. Onun sözlərinə görə, hakimiyyətin nəzərində Ermənistan vətəndaşları vergiləri gizlədə bilən potensial cinayətkarlardır. Burada sadə vətəndaşların həyatını yaxşılaşdırmaq istiqamətində nəzərə çarpan heç bir tendensiya yoxdur”, – sabiq nazir deyib.

“İndi bəyannamələri doldurmayın, biz hələ də boykot edib imza toplamaqla qanunu ləğv edə bilərik. Əgər son tarix buraxılsa, kimin doldurub, kimin doldurmadığını öyrənənə qədər bildiriş prosesi təxminən iki ay çəkəcək. Bəyannamə bildirişin alındığı tarixdən 30 gün ərzində doldurula bilər və yalnız bundan sonra onu doldurmasanız, 5000 dram cərimə gələcək.

Mən cəmiyyətin emosiyaya əsaslanmayan qərar verməsini istəyirəm, lakin əminliklə və dəqiqliklə bildirirəm ki, bu məcburi bəyannamə hamımıza qarşı yönəlib”, – M.Arakelyan bildirib.

O hesab edir ki, Ermənistan hakimiyyətinin elementar iqtisadi bilikləri yoxdur, əks halda, belə bir addım atmazdılar. Çünki onların məqsədi daha çox vergi toplamaqdırsa, o zaman bunu belə etmək mümkün olmayacaq.