Gərginlik artır | Netanyahu Suriya ilə bağlı kritik qərar verdi

İsrail Ordusu Suriya ilə sərhəddə Qolan təpələrindəki bufer zonadan kənara çıxıb.

Bu barədə "The New York Times" İsraildəki mənbəyə istinadən məlumat yayıb.

Nəşrin məlumatına görə, sözügedən məsələ Suriyanın sabiq prezidenti Bəşər Əsədin ölkəni tərk etməsi ilə bağlıdır və bu, regionda qeyri-sabitliyin artmasına səbəb ola bilər.

İsrail Ordusunun bufer zonadan kənarda olduğunu Baş Qərargah rəisi Herzi Halevi də təsdiqləyib.

Son məlumatlara görə, İsrail Ordusu Suriya ilə bufer zonada yerləşən Hermon dağının qarşı tərəfdəki nöqtəsini ələ keçirib.

Bundan əvvəl Baş nazir Benyamin Netanyahu iki ölkə arasında 1974-cü ildə əldə edilmiş razılaşmanın iflasa uğradığını bildirib.

Xatırladaq ki, noyabrın 27-də Suriya müxalifət silahlı birləşmələri Hələb və İdlib əyalətlərində hökumət qüvvələrinin mövqelərinə qarşı genişmiqyaslı hücuma keçib. Dekabrın 7-də axşam saatlarında Suriya Prezidenti Bəşər Əsədin əleyhdarları bir neçə böyük şəhəri – Hələb, Həma, Deyr əz-Zor, Dəraa və Homsu ələ keçiriblər. Dekabrın 8-də onlar Dəməşqə daxil olublar.

Bəşər Əsədin isə hazırda Rusiyada olduğu bildirilir.