Gözlənilməz təmas: Putin və Paşinyan arasında Çində özəl görüş baş tutdu

Rusiya Prezidenti Vladimir Putinlə Ermənistanın Baş naziri Nikol Paşinyan arasında görüş keçirilib.

Görüş Çində keçirilən Şanxay Əməkdaşlıq Təşkilatının (ŞƏT) sammiti çərçivəsində baş tutub.

Rusiya Prezidenti Paşinyanla uzun müddət görüşmədiklərini bildirib. Putin qeyd edib ki, bu müddət ərzində müzakirə üçün həm ikitərəfli, həm də regional xarakterli xeyli sual yaranıb.

“Ümid edirəm ki, bugünkü görüşümüz faydalı və məzmunlu olacaq”, ‒ deyə Rusiya Prezidenti vurğulayıb.

Paşinyan isə Rusiya ilə Ermənistan arasında mövcud olan tərəfdaşlıq və dialoqdan məmnun olduğunu bildirib və ölkələri qardaş adlandırıb.

“Bizim hər zaman çox məşğul gündəliyimiz var. Mən aramızda yaranan tərəfdaşlıqdan, şəxsi dialoqumuz və əlbəttə ki, qardaş ölkələrimiz arasındakı fəal dialoqdan çox şadam”, ‒ Paşinyan görüşdə belə deyib.

Qeyd edək ki, ŞƏT sammitində itirak edən qonaqların şərəfinə təşkil olunmuş qəbulun ardından baş tutan görüş Rusiya Prezidentinin köməkçisi Yuri Uşakovun jurnalistlərə açıqladığı ilkin cədvəldə nəzərdə tutulmamışdı. Lakin Kremlin nümayəndəsi dərhal qeyd edib ki, qrafik sərt deyil və ona istənilən anda müxtəlif formatlarda yeni bəndlər əlavə edilə bilər.