Gündüz yuxusu üçün optimal vaxt nə vaxtdır?

"Bəzi insanlar üçün gün ərzində qısamüddətli yuxu bir qədər dincəlmək və yenidən güc toplamaq baxımından faydalı ola bilər. Bu, xüsusilə, səhər tezdən duran və günün ikinci yarısında yorğunluq hiss edən insanlar, həmçinin xroniki xəstəlikləri olan və tez yorulan şəxslər üçün tövsiyə olunur".

Bunu yerli mediaya rusiyalı həkim Alyona Qavrilova deyib.

Onun sözlərinə görə, gündüz yuxusu üçün optimal vaxt günorta saat 15:00-a qədərdir, davametmə müddəti isə 10-30 dəqiqə olmalıdır.

"Bu, ikinci enerji dalğası əldə etməyə kömək edir, lakin dərin yuxuya getmədən və bioloji saatın rejimini pozmadan", – deyə Qavrilova bildirib.

Həkim bu saatdan sonra mürgüləməyi məsləhət görmür: "Çünki bu zaman gecə yuxusu ilə bağlı problemlərin yaranma ehtimalı artır".

Mütəxəssisin sözlərinə görə, əgər gündüz yuxusu yarım saatdan çox davam edərsə, insan yuxunun daha dərin mərhələsinə keçə bilər və oyanmaq çətinləşər. Bu isə baş ağrısına, halsızlığa və düşüncə aydınlığının azalmasına səbəb ola bilər.

Həkim vurğulayıb ki, gündüz yuxusu yuxusuzluqdan əziyyət çəkən insanlar üçün uyğun deyil. Əgər yuxusuzluğu olan şəxs gündüz yatarsa, bu, gecə yuxusunun keyfiyyətini daha da pisləşdirə bilər.