Gürcüstan Qərblə inteqrasiyadan əl çəkməyəcək və… | Voyçex Qoretski Tbilisinin siyasətindən danışdı

Gürcüstanı rusiyayönümlü hökumət və qərbyönlü cəmiyyətə malik bir ölkə kimi təsəvvür etmək yanlışdır, hər şey o qədər də sadə deyil. Tbilisi həmişə manevr edəcək. Gürcüstan Qərblə inteqrasiyadan əl çəkməyəcək və Rusiya ilə əməkdaşlıqdan faydalanacaq.

Bunu Polşa Şərqşünaslıq Mərkəzinin baş elmi işçisi Voyçex Qoretski deyib.

“Gürcüstanda müxalifət bölünüb və parlamenti boykot etmək qərarını heç də hamısı verməyib. Onlar cəmiyyətin onlara nə qədər dəstək verəcəyini görmək istəyirlər ki, bu da nümayişlərdən bəlli olacaq”, – o bildirib.

Ekspert qeyd edib ki, “Gürcü Arzusu”nun siyasətçiləri bir növ “fəlsəfə daşı” tapıblar:

“Onlar bilirlər ki, gürcü cəmiyyəti bir tərəfdən qərbyönlüdür. Sorğularda respondentlərin 80 %-ə qədəri Gürcüstanın Avropa Birliyinə üzv olmasını istəyir, digər tərəfdən də bu cəmiyyətin mühafizəkar olduğu məlumdur. Həmçinin bu cəmiyyət sabitlik istəyir və müharibədən qorxur. “Gürcü Arzusu” bütün bacılara sırğa paylayan partiyadır”.

V.Qoretski əmindir ki, “müxalifət = müharibə” povesti Gürcüstanda bir çox insana təsir edir.