Gürcüstanda siyasi gərginlik pik həddə | Etirazlar davam edir

Gürcüstanın Baş naziri İrakli Kobaxidze Prezident Salome Zurabişvilini müvafiq qanun layihəsini tənqid etdiyinə görə xarici agent adlandırıb.

Aprelin 17-də Gürcüstan parlamenti S.Zurabişvilinin, müxalifətin və Qərb diplomatlarının əleyhinə çıxış etdiyi “Xarici agentlər haqqında” qanun layihəsini təsdiqləyib.

Prezident bildirib ki, “Xarici agentlər haqqında” qanun 3 oxunuşda qəbul olunarsa, ona veto qoymağı planlaşdırır.

“S.Zurabişvilinin özü də xarici agentdir, buna görə də onun ala biləcəyi yeganə səs xarici qüvvədir, bu barədə dəfələrlə danışmışıq”, – deyə İ.Kobaxidze bildirib.

Qeyd edək ki, Tbilisidə hakim “Gürcü Arzusu” partiyasının təqdim etdiyi “Xarici agentlər haqqında” qanun layihəsi ilə əlaqədar 4 gündür ki, genişmiqyaslı etiraz aksiyası keçirilir. Parlament binasının qarşısındakı Rustaveli prospektini bağlayan minlərlə etirazçı “Rusiya qanununa yox”, “Avropaya hə, Rusiyaya yox” şüarları səsləndirirlər.