Gürcüstandakı seçki kampaniyası Ukraynada sərt etirazla qarşılandı
Qonşu Gürcüstanda keçiriləcək parlament seçkiləri yaxınlaşdıqca ölkədə siyasi vəziyyət daha da gərginləşir.
Bu dəfə hakim “Gürcü Arzusu” partiyasının seçki ilə bağlı reklamları narazılıqla qarşılanıb.
Belə ki, oktyabrda keçiriləcək parlament seçkiləri ilə əlaqədar küçələrdə və internetdə "Müharibəyə yox! Sülhü seçin!" şüarlı bannerlər yerləşdirilib.
Bannerlərdə Ukraynada müharibə nəticəsində baş verən dağıntılarla Gürcüstandakı vəziyyət müqayisə olunub.
Politoloq Levan Çxeidzenin sözlərinə görə, 2008-ci ildə Gürcüstan Rusiya aqressiyasının qurbanı olub:
“Məktəblər, binalar Rusiya aviasiyası və artilleriyası tərəfindən yerlə bir edildi. Çox sayda dinc vətəndaşımız həlak oldu. Bu gün isə Ukraynada dağıdılan məktəblərin, kilsələrin görüntülərindən seçki kampaniyasında istifadə etmək düzgün deyil.
Bu nə siyasətə, nə də beynəlxalq əlaqələrə uyğunlaşmır. Reklamın məzmunu Ukraynada baş verənlərdə məhz elə Ukraynanı günahlandırır. Hansı siyasi partiyanın tərəfdarı olmasından asılı olmayaraq bu cür reklam qəbul edilməzdir”.