Yaxın Şərqi silkələyən hücum | Öldüyü deyilən Həsən Nəsrullahla bağlı yeni məlumatlar
İsrail Hərbi Hava Qüvvələri sentyabrın 27-dən 28-nə keçən gecə “Hizbullah”ın Beyrutdakı mərkəzi hərbi qərargahına hücum edib.
Endirilən zərbə zamanı hərəkatın baş katibi Həsən Nəsrullahın qərargahda olduğu və onun öldürüldüyü iddia edilib.
Bu barədə “The Times İsrail” məlumat yayıb.
Bildirilib ki, həssas məsələləri müzakirə etmək üçün adının açıqlanmasını istəməyən “Hizbullah”a yaxın mənbə “Cümə axşamından etibarən Seyid Həsən Nəsrullahla əlaqə kəsilib” deyir. O, Nəsrullahın öldürülüb-öldürülmədiyini təsdiqləməyib.
Eyni zamanda zərbə zamanı qərargahda Həsən Nəsrullahın həyat yoldaşı və qızı Zeynəb Nəsrullahın da olduğu, onların da öldürüldüyü xəbəri yayılıb.
İsrail Müdafiə Ordusunun nümayəndəsi Daniel Haqari qeyd edib ki, ordu müdafiə və hücuma maksimum hazır vəziyyətdədir.
İsrail Müdafiə Qüvvələrinin Baş Qərargah rəisi general-leytenant Herzi Halevi “Hizbullah” terror təşkilatının lideri Həsən Nəsrullahın öldürülməsindən sonra İsrailin ölkə və vətəndaşlarını təhdid edən hər kəsə lazımi cavabın veriləcəyini bildirib.
Qeyd olunub ki, İsrailin Baş naziri Benyamin Netanyahu hələ sentyabrın 26-da Nyu-Yorka uçmazdan əvvəl “Hizbullah”ın qərargahına zərbə endirmə əməliyyatını təsdiqləyib, bundan sonra İsrail Ordusu uyğun anı gözləyib.