HƏMAS 2014-cü ildə əsir götürülən israilli əsgərin meyitini qaytarıb

Qəzza zolağında bir nəfər ölüb, 5 fələstinli yaralanıb. Bununla da 2023-cü ildən İsrailin hücumları nəticəsində Qəzzada ölənlərin sayı 69 176 nəfərə çatıb.

Bu barədə Qəzza zolağının səhiyyə xidməti informasiya yayıb.

İsrail Müdafiə Ordusunun noyabrın 9-da yaydığı məlumatda isə bildirilir ki, sarı xətti keçdiklərinə görə 3 fələstinli atəşə tutulub və yaralanıb.

Qeyd edək ki, oktyabrın 10-da İsraillə HƏMAS arasında əldə olunan atəşkəsdən sonra Qəzza zolağına hücumların sayı nəzərəçarpacaq dərəcədə azalıb.

Atəşkəsi pozmaq ittihamlarına baxmayaraq, ABŞ-nin sülh planına əsasən, tərəflər arasında girov və meyit mübadiləsi davam edir. HƏMAS 2014-cü ildə əsir götürdüyü israilli əsgərin meyitini təhvil verib. Bu meyitin qaytarılmasında Türkiyənin vasitəçilik etdiyi barədə xarici mediada məlumat var.

Bundan başqa, Türkiyə Qəzza zolağında tunellərdə ilişib qalan 200 dinc sakini də xilas etməyə çalışır.

Qəzza zolağında aclıqdan əziyyət çəkən uşaqlara tibbi yardım göstərilir. Həmçinin viruslar yayıldığına və yoluxmalar artdığına görə azyaşlıların vaksinasiyası aparılır.