Hakan Fidan Suriyadakı paralel qüvvələrə səsləndi

“Əfsus ki, PKK terror təşkilatının bir qolu olan “Suriya Demokratik Qüvvələri” dialoqa getmir və onlarla güc yolu ilə nəyəsə nail olmaq mümkündür”.

Bunu Türkiyənin xarici işlər naziri Hakan Fidan “TRT Haber”in canlı efirində deyib.

Hakan Fidan qeyd edib ki, müxtəlif kanallar vasitəsilə Suriyada bütün problemlərin həlli tərəflərə çatdırılır: "Amma nəticə yoxdur. Hələbdə silahlı insidentlər yaşanır".

Nazir əlavə edib ki, Hələbdə vahid dövlət qurumları vasitəsilə xidmət dövrü başlayacaq.

O, Suriyada antiterror əməliyyatlarının qaçılmaz olduğunu və prosesin yaxın zamanda başa çatacağına ümid etdiyini bildirib:

“Müvafiq qurumlarımız, kəşfiyyatımız, diplomatlarımız və hərbçilərimiz bu mövzunu qarşı tərəflərlə müzakirə edirlər. SDG-yə və suriyalılara bu mesajlar çatdırılır. Lakin təəssüf ki, əvvəldən də gördüyümüz kimi, burada hər hansı bir dəyişiklik baş vermədi və bu gün Hələbdən başlayan prosesi artıq yaşayırıq. Ümid edirəm ki, bu proses yaxın zamanda başa çatacaq, oradakı paralel struktur aradan qalxacaq və Hələbdə hansı millətə aid olmasından asılı olmayaraq bütün vətəndaşlara vahid dövlət qurumları vasitəsilə xidmət göstərən tək bir dövlət mövcud olacaq. Olmalı olan da məhz budur”, – deyə Hakan Fidan bildirib.