Hakan Fidan türkmanların haqlarından danışdı | Layiq olduqları bütün hüquqları almalıdır...

08 aprel 2025 375 baxış

Osmanlı imperiyası dağılandan sonra Türkiyə ilə həmsərhəd olan bütün ölkələrdə türk var idi, lakin bu toplum heç vaxt separatçı hərəkatlarda iştirak etməyib, quruculuq rolunu oynayıblar.

Bunu Türkiyə xarici işlər naziri Hakan Fidan İraqın UTV telekanalına müsahibəsində deyib.

“Ona görə də inanırıq ki, türkmanlar İraqın hörmətli oğulları olaraq layiq olduqları bütün hüquqları almalıdırlar. Bütün xalqlara verilən hüquqlar kimi”, ‒ o bildirib.

H.Fidan qeyd edib ki, türkmanların tarixi səbəblərdən sürgün olunmaları və yaşadıqları yerlərdə siyasi problemlərlə bağlı zəifləməsi türkmanlara qarşı deyil, Türkiyəyə qarşı yönəlmiş bir quruluşdur:

“Baxın, bu cür xırda oyunlarla oradakı nisbətən kiçik camaat üzərində üstünlük əldə etmək üçün addımlar atmaqla qalibiyyət əldə etməyəcəksiniz, əksinə, daha da böyük Türkiyənin qəzəbinə düçar olacaqsınız. Əvəzində Türkiyə ilə əlaqələri gücləndirmək üçün mövcud türkman əhalisindən istifadə edə bilərsiniz”.

#Türkiyə