Hakan Fidandan Cənubi Qafqazla bağlı mühüm açıqlama - Baku TV

"Türkiyə üçün Qafqazda davam edən sülh prosesi də daxil olmaqla, bir sıra qlobal məsələlərdə Rusiyanın tutduğu mövqe önəmlidir".

Bunu "CNN Türk" telekanalının canlı yayımında Türkiyənin xarici işlər naziri Hakan Fidan Ruisya lideri Vladimir Putinlə görüşü barədə danışarkən deyib.

Qara dəniz, Cənubi Qafqaz, Mərkəzi Asiya, Yaxın Şərq və Afrikanın Türkiyə üçün mühüm coğrafiyalar olduğunu deyən Fidan sözügedən ərazilərdə ölkəsinin təsirli xarici, iqtisadi və təhlükəsizlik siyasəti olduğunu diqqətə çatdırıb.

"Putinlə görüşdə gündəmə gətirdiyim məsələr bunlardır: birinci, Ukraynadakı müharibədə Rusiyanın son mövqeyi nədir? İkinci, Qafqazda davam edən sülh prosesi və Rusiyanın burada tutduğu mövqe bizim üçün önəmlidir. Fələstin, Qəzza məsələsində tutduqları mövqe və nə düşündükləri önəmlidir", – türkiyəli nazir bildirib.

Qeyd edək ki, Hakan Fidan Rusiya–ASEAN sammiti çərçivəsində iyunun 17-də Vladimir Putinlə görüşüb.

Hakan Fidan həmçinin əlavə edib ki, Türkiyə lideri Rəcəb Tayyib Ərdoğan rusiyalı həmkarı Vladimir Putinlə regional məsələlərlə bağlı müntəzəm məsləhətləşmələr aparır.

"Bildiyiniz kimi, Prezidentimiz daim cənab Putinlə məsləhətləşir. Çünki bizim üçün vacib olan bölgəmizə, Qara dəniz hövzəsində davam edən münaqişəyə baxın. Qafqaz bizim üçün vacibdir, Mərkəzi Asiya və Yaxın Şərq də elədir və bütün bu bölgələrdə, eləcə də Afrika və Liviyada Türkiyə effektiv xarici və iqtisadi siyasət yürüdür", – deyə Hakan Fidan "CNN Türk"ə danışıb.

Fidan əlavə edib ki, Türkiyə rəhbərliyinin Putinin regional və digər xarici siyasi məsələlərlə bağlı baxışlarını şəxsən onun özündən öyrənməsi vacibdir.

"Cənab Putinlə əlaqələrim onunla Prezidentimiz Rəcəb Tayyib Ərdoğan arasındakı dialoq kimi qəbul edilməlidir. Mən ondan mesajlarını Putinə çatdırıram və cavablarla, şərhlərlə qayıdıram. Mövzulara gəldikdə isə vacib məsələ Rusiya-Ukrayna münaqişəsinin hazırkı vəziyyətidir. Keçən ilin mayında Rusiyaya səfər etdiyim zaman bu barədə ətraflı müzakirə etdik. Putin öz vizyonunu təqdim etdi. Bundan sonra biz bunu vasitəçilərlə geniş müzakirə etdik", – deyə Hakan Fidan bildirib.