Hakimiyyətin addımları ABŞ-ni buna vadar etdi | Gürcü politoloqlardan Baku TV-yə açıqlama

ABŞ Gürcüstanda baş verən ölkədaxili siyasi proseslərdən narazıdır. Gərginliyin əsas səbəbinin rus qanunu adlandırılan sənədin Gürcüstanda qəbulu göstərilir.

Politoloq Nika Çitadzenin sözlərinə görə, ölkənin hakim partiyasının bu qanunu parlamentdə qəbul etməsi demokratiya baxımından geriyə doğru atılmış addımdır.

“Buna qarşılıq olaraq da ABŞ cavab tədbirləri görür. Gürcüstan müstəqilliyini bərpa etdikdən sonra Amerika tərəfindən Gürcüstana 6 milyard dollar məbləğində yardım ayrılıb. Buna baxmayaraq, hakimiyyət ABŞ Gürcüstanı müharibəyə cəlb etməyə çalışmaqda ittiham edir. Həmçinin ABŞ və Qərbin Gürcüstanda çevriliş etmək üçün qeyri-hökumət təşkilatlarını maliyyələşdirdiyi bildirilir”, – deyə politoloq bildirib.

Bəzi ekspertlər isə ABŞ və Qərbin 30 ildir ki, Gürcüstana verdiyi vədləri yerinə yetirmədiklərini, Gürcüstan hakimiyyətinin apardığı siyasətin isə ölkənin maraqlarına cavab verdiyi qənaətindədir.

“Bu gün ABŞ - Gürcüstan münasibətləri göstərir ki, Gürcüstan hakimiyyəti həqiqətən ölkəni düşünürək hərəkət edir. Çünki 30 il ərzində ABŞ və Qərb Gürcüstana Avropa İttifaqına, NATO-ya üzv olmağı vəd edirdi. Ancaq biz 2008-ci il müharibəsini yaşadıq. Ona görə də bu gün Gürcüstan hakimiyyətinin apardığı siyasət tamamilə ölkəmizin maraqlarına cavab verir. Başqa cür ölkənin maraqlarını qorumaq mümkün deyil”, – deyə politoloq Quram Marxuliya qeyd edib.