Haniyənin qətli ilə bağlı ABŞ-dən aranı qarışdıran açıqlama | Diqqət çəkən məqamlar

HƏMAS-ın Siyasi Bürosunun rəhbəri İsmayıl Haniyənin Tehranda öldürülməsi məsələsi son günlərdə müzakirə edilən mövzulardan birinə çevirilib. Liderin ölümü ilə bağlı İranın və ABŞ-nin fərqli açıqlamalar verməsi isə mediada diqqət çəkib.

Belə ki, xarici mediada Vaşinqtonun və İsrailin Haniyənin otağına əvvəlcədən bomba yerləşdirilməsinə dair iddialar öz əksini tapıb. İran tərəfi isə rəhbər şəxsin raket hücumu edilməsi ilə öldürüldüyünü deyir.

Məlumatda Haniyənin Tehrandakı rəsmi iqamətgahında yerləşən yataq otağına 2 ay əvvəlcədən partlayıcı qurğunun yerləşdirilməsi qeyd olunur. Hətta qurğunun süni intellektlə işləməsi da vurğulanıb. İsrailin sözegedən qurğunu yüksək mühafizə olunan bir binanın daxilinə yerləşdirməyə nail olması fikri İranın kəşfiyyat və təhlükəsizliyinin etibarlılığını şübhə altına salır.

Digər tərəfdən, HƏMAS-ın yaydığı bəyanatda da Haniyənin İsrailin hava hücumu nəticəsində öldürüldüyü deyilir. İran mediasında da əvvəlcə üç raketin pilotsuz uçuş aparatı ilə buraxılması, daha sonra isə raketin ölkə xaricindən atılması barəsində məlumat verilir.

Bundan əlavə, mediada “Hizbullah” lideri Həsən Nəsrullahın Tehranda andiçmədə iştirak etməməsinin səbəbinin İran rəsmilərinin ona təhlükəsizlik barədə xəbərdarlıq etmələri olduğu iddiası da göstərilib. Bəs Nəsrullahı qoruyan İran niyə Haniyəyə sahib çıxa bilmədi?