Haniyənin qətlində ABŞ-nin əli var? - İran və ABŞ nümayəndələri qarşı-qarşıya

BMT-nin Təhlükəsizlik Şurası İsmayıl Haniyənin öldürülməsindən sonra təcili iclas keçirib.

İranın çağırışı, Rusiya, Əlcəzair və Çinin dəstəyi ilə baş tutan görüşdə Tehranda baş verənlər müzakirə edilib.

“İsrailin “Hizbullah” və digər hərbi qruplaşmalara qarşı özünümüdafiə hüququ var. Amerika Birləşmiş Ştatları HƏMAS lideri İsmayıl Haniyənin ölümündən xəbərsiz olub və onun öldürülməsində iştirak etməyib. Bizim sui-qəsdlə əlaqəmizi təsdiqləyəcək heç bir əyani sübut da yoxdur. Ümumiyyətlə, Yaxın Şərqdə sülh və təhlükəsizliyin bərqərar edilməsinə şərait yaradacaq hadisələr barəsində fərziyyə yürütməmək daha yaxşı olardı. Əks halda regionda müharibənin genişlənməsi qaçılmazdır”, – deyə ABŞ-nin BMT-dəki daimi nümayəndəsi Robert Vud qeyd edib.

Bunun cavabında İranın BMT-dəki daimi nümayəndəsi Əmir Səid İrəvani hücuma görə ABŞ-nin də məsuliyyət daşıdığını bildirib:

“İsmayıl Haniyənin ölümü ilə bağlı ünvanladığımız məktubda da qeyd etdiyimiz kimi, bütün bunlar İsrailin apardığı siyasətin nəticəsidir. Bu hadisədə onun strateji müttəfiqi və əsas dəstəkçisi kimi ABŞ-nin daşıdığı məsuliyyəti də görməmək mümkün deyil. Bu hücum Vaşinqtonun köməyi olmadan baş tuta bilməzdi. BMT-nin Təhlükəsizlik Şurası isə beynəlxalq sülh və təhlükəsizliyin qorunması vəzifəsini yerinə yetirə bilmədi. Bunu Rusiyanın təklif etdiyi bəyanat layihəsinin bloklanması sübut etdi. Layihəyə etiraz edənlər ABŞ, Birləşmiş Krallıq və Fransa idi”.