Haniyənin yerinə gələn şəxsə İsrail rəsmilərindən kəskin etiraz

HƏMAS-ın Siyasi Bürosunun rəhbəri İsmayıl Haniyənin ölümündən sonra onun yerinə qruplaşmanın tanınmış simalarından olan Yəhya Sinvar gəlib. Sinvarın gəlişinə reaksiyalar isə müxtəlif olub.

“İsmayıl Haniyənin yerinə Yəhya Sinvarın HƏMAS-a lider təyin edilməsi onun tezliklə aradan götürülməsi və bu təşkilatın yer üzündən silinməsi üçün daha bir səbəbdir”, – deyə İsrailin xarici işlər naziri İsrael Katz sosial şəbəkə hesabında yazıb.

İsrail Müdafiə Ordusunun sözçüsü Daniel Haqari isə “Yəhya Sinvar üçün yalnız bir yer var, o da Məhəmməd Deif və 7 oktyabr təşkilatçılarının yanıdır”, – deyə reaksiya verib.

Livan xalqı yeni liderin seçilməsini böyük coşqu ilə qarşılayıb. Onlar küçələrə axışaraq, onun gəlişini qeyd ediblər.

Bütün bunların fonunda, Sinvarın siyasəti ilə bağlı Yaxın Şərqdə narahatlıqlar da artıb. Xarici medianın yaydığı məlumata görə, analitiklər HƏMAS-ın rəhbərlik üçün ən təhlükəli şəxsi seçdiyini açıqlayıblar. Başına 400 min dollar mükafat qoyulan Yəhya Sinvarın liderlik tərzi Haniyənin proseslərə yanaşmasından fərqli olaraq aqressiv və barışmazdır. Yəhya Sinvar İsraillə danışıqların qəti əleyhdarıdır.

Beləliklə, Qəzzada atəşkəslə bağlı danışıqların aparılması məsələsi də Haniyədən sonra dalana dirənib.