Hansı halda atəşkəs ola bilər? | Əgər İsrail bunu etməsə...

İsrail tərəfi yeni şərtlər irəli sürməyi dayandırsa, Qəzza zolağında atəşkəs və anklavda saxlanılan girovların azad edilməsi ilə bağlı İsraillə razılaşma mümkündür.

Bu barədə Fələstinin HƏMAS hərəkatının yaydığı bəyanatda deyilir.

“İslami Müqavimət Hərəkatı HƏMAS təsdiq edir ki, vasitəçi qismində çıxış edən qətərli və misirli qardaşlarımızın rəhbərliyi ilə Dohada aparılan ciddi və müsbət danışıqları nəzərə alaraq, İsrail yeni şərtlər irəli sürməyi dayandırarsa, atəşkəs və girovların mübadiləsinə dair razılaşma əldə oluna bilər”, – deyə bəyanatda vurğulanır.

Bundan əvvəl “Bloomberg” agentliyi İsrail hakimiyyəti və HƏMAS hərəkatının danışıqlarda irəliləyiş əldə etdiyini və tərəflərin Qəzza zolağında atəşkəs sazişi bağlamağa yaxın olduqlarını qeyd edib.

Məlumata görə, dekabrın 16-da İsrail nümayəndə heyəti Qəzza ilə bağlı danışıqlar aparmaq üçün Qətərə yollanıb. İddia olunur ki, detalların çoxu razılaşdırılıb, lakin ilk mərhələdə azad edilməli olan girovların sayı əsas mübahisə mövzusudur.