Hava limanları müvəqqəti bağlanıb

Son sutka ərzində Rusiya Ordusu müxtəlif silah növlərindən istifadə edərək Ukraynanın Zaporojye bölgəsində 25 yaşayış məntəqəsinə 720 hücum edib. Nəticədə yaşayış evlərinə, nəqliyyat vasitələrinə və infrastruktura ziyan dəyib.

Bu barədə Zaparojye hərbi administrasiyasının nümayəndəsi İvan Federov məlumat verib. Bildirilib ki, bölgələrə 9 aviasiya, 472 PUA, 12 raket, 227 artilleriya zərbəsi endirilib.

Ölkənin Müdafiə Nazirliyindən isə bildirilib ki, noyabrın 1-nə keçən gecə Rusiya Silahlı Qüvvələri 223 PUA ilə hücumlarını həyata keçirib. PUA-lardan 140-ı “Şahed” tipli olub. Hava hücumundan müdafiə qüvvələri PUA-lardan 206-nı havada olarkən zərərsizləşdirib.

Çerniqov vilayəti də noyabrın 1-i gecə və səhər saatlarında Rusiyaya məxsus PUA hücumuna məruz qalıb. Kənd təsərrüfatı müəssisəsinə zərbə endirilib və nəticədə anqar yanıb. Poltava vilayətində isə qaz istehsalı müəssisəsində yanğın baş verib. Bir neçə insan yaralanıb.

Ukrayna Ordusunun hərbi qərargahından verilən məlumata görə, son sutka ərzində Rusiyanın 900 hərbçisi, 6 tank və 9 artilleriya sistemi məhv edilib.

Rusiya Müdafiə Nazirliyindən isə bildirilib ki, hava hücumundan müdafiə qüvvələri gecə ərzində Ukraynanın təyyarə tipli 98 PUA-sını məhv edib.

“Rosaviasiya”nın məlumatına əsasən, sərnişinlərin təhlükəsizliyinin qorunması məqsədilə Tambov, Kaluqa, Penza, Samara və Saratovda hava limanlarında təyyarələrin uçuşuna və qəbuluna müvəqqəti məhdudiyyətlər qoyulub.