HƏMAS əsir götürdüyü israilli qızın videosunu yaydı

İsraillə HƏMAS arasında silahlı toqquşma artıq 11 gündür davam edir.

HƏMAS ilk dəfə girov götürdüyü şəxslərdən birinin videosunu yayıb. İddialara görə, radikal qruplaşmanın üzvlərinin idarə etdiyi yerli “Telegram” kanalı vasitəsilə yayılan kadrlarda 21 yaşlı Mia Şem adlı qız qolundan güllə yarası aldığını bildirir.

Qəzza zolağında xəstəxanada əməliyyat olunduğunu, əməliyyatın isə 3 saat fələstinli həkimlər tərəfindən icra olunduğunu deyir. O, girov olmasına baxmayaraq, şiddətə məruz qalmadığını xüsusi vurğulayır:

“Mənə baxırlar, dərman verirlər, hər şey qaydasındadır. Sadəcə xahiş edirəm ki, məni tez bir zamanda evə, valideynlərimin, bacı-qardaşlarımın yanına aparsınlar. Zəhmət olmasa, mümkün qədər məni buradan tez çıxarın”.

Videonun nə vaxt və hansı şəraitdə çəkildiyi məlum deyil. “The Jerusalem Post” qeyd edir ki, Mia Şemin ailəsi videodakı qızın onların övladının olduğunu təsdiq edərək onun tez bir zamanda xilas edilməsi üçün dövlətə müraciət ünvanlayıblar.