HƏMAS üçün son gediş: 300 min israilli orduya çağırılır

İsraildə ehtiyatda olan təxminən 300 min hərbçi orduya çağırılacaq.

Ölkənin Müdafiə Nazirliyindən bildirilib ki, çağırışçılar “Dəmir Qılınclar” əməliyyatına cəlb olunacaqlar və bu, İsrail tarixindəki ən böyük səfərbərlikdir.

Bununla yanaşı, ölkənin müdafiə naziri Yoav Qallant əmr verib ki, İsrail Qəzzanı tam mühasirəyə alsın.

“Oraya nə elektrik, nə qida, nə yanacaq təchizatı olacaq”, – deyə nazir qeyd edib.

Həmçinin İsrail Ordusu artıq Qəzzada HƏMAS-a qarşı hücuma başladığını elan edib. Müdafiə Nazirliyindən bildirilib ki, hərbçilər ölkə ərazisinə nəzarəti bərpa etdikdən sonra HƏMAS-dan olan fələstinli radikallara qarşı hərbi əməliyyatın hücum mərhələsinə keçib. Nəticədə İsrail hərbçiləri Qəzzaya yaxın ərazilərdə yüzlərlə terrorçunu məhv edib. Bundan başqa, “The Times of Israel” nəşrində HƏMAS-ın rəhbərlərindən olan Yəhya Sinvarinin tezliklə öldürüləcəyi barədə xəbər yazılıb. Qeyd olunub ki, İsrail Ordusunun Qəzza zolağında həyata keçirdiyi hərbi əməliyyatlar nəticəsində Yəhya Sinvar əsas hədəflərdən olacaq.

Xatırladaq ki, oktyabrın 7-də səhər saatlarında İsrail ərazisi Qəzza zolağından raket atəşinə tutulub. İsrail Ordusu müharibə hazırlığı vəziyyətinə gətirilib və cavab olaraq "Dəmir Qılınclar" əməliyyatına başlanılıb.