Hərbçilərlə mülki şəxslər arasında dava | İki erməni zabit bıçaqlandı

Ermənistanda mülki şəxslərlə hərbçilər arasında kütləvi dava olub.

Vazgen Sarkisyan adına Hərbi Universitetin yaxınlığında baş verən insident zamanı Ermənistan Ordusunun zabiti David Sayadyan ölüb.

Yerli medianın yaydığı məlumata görə, borcun qaytarılması tələbi ilə bağlı tərəflər arasında mübahisə düşüb.

Qarşıdurmada 5-i hərbçi olmaqla 8 nəfər iştirak edib. Mübahisə zamanı borclu olan mülki şəxs hərbçilərin ünvanına təhqiramiz ifadələr işlədib. Bundan sonra o, özü ilə gətirdiyi bıçaqla Müdafiə Nazirliyinin zabitləri – baş leytenantlar Gevorq Marqaryan və David Sayadyana ağır xəsarətlər yetirib.

Onlar təcili tibbi yardım maşını ilə xəstəxanaya çatdırılsa da, David Sayadyanın həyatını xilas etmək mümkün olmayıb.

Hadisə ilə bağlı Ermənistan Cinayət Məcəlləsinin müvafiq maddələri üzrə cinayət işi başlanıb. Nazirliyin mətbuat katibi Aram Torosyan hərbi qulluqçuların da iştirak etdiyi hadisə ilə bağlı açıqlama verməkdən imtina edib.