Həşəratlar niyə yoxa çıxır? | Elm adamları həyəcan təbili çaldı

ABŞ-nin Binghamton Universitetinin alimləri həşəratların nəslinin kəsilməsinin səbəbini müəyyən ediblər.

Araşdırma "BioScience" jurnalında dərc olunub.

2017-ci ildə aparılan araşdırma həşəratların sayının 30 il ərzində 75% azaldığını ortaya qoyub.

Binghamton Universitetinin alimləri 500-dən çox fərziyyədən ibarət 175-dən çox elmi rəyi və meta-analizi təhlil ediblər. Beləliklə, 3 mindən çox amil ortaya çıxarıblar. Buraya şəhərin genişləndirilməsi, iqlim dəyişikliyi və ətraf mühitin çirklənməsi daxildir.

Təsirlərdən ən əsası kənd təsərrüfatıdır. Tədqiqatçılar vurğulayırlar ki, ekoloji stres amilləri bir-biri ilə bağlıdır: iqlim yanğınlara, yağıntılara və temperatura təsir edir, bu da öz növbəsində torpaqdan istifadəyə və çirklənməyə təsir göstərir.

Alimlər tədqiqat mövzularının seçimində də güclü qərəzlilik aşkar ediblər. Ən çox diqqət arılara və kəpənəklərə verilir.

Müəlliflərdən biri Kristofer Hulş deyib: “Əgər diqqətimizi yalnız arılara və kəpənəklərə yönəltsək, minlərlə başqa növ həşəratı itirə bilərik və bu, təbiət tarazlığının daha da pozulmasına səbəb ola bilər".