“Hizbullah”ın bu hücumu aranı bir-birinə qatdı | İsrail hansı addımı atacaq?

ABŞ Qolan təpələrindəki Məcdəl Şəms məntəqəsinə raket hücumunun arxasında “Hizbullah”ın dayandığına dair bütün işarələrin olduğunu bildirib.

Bu bəyanatla ABŞ dövlət katibi Entoni Blinken çıxış edib. Bütün əlamətlər raketin həqiqətən “Hizbullah” tərəfindən atıldığını göstərir.

“Biz İsrailin öz vətəndaşlarını terror hücumlarına qarşı müdafiə etmək hüququnun arxasındayıq”, – deyən Blinken digər tərəfdən Qəzzada qarşıdurmanı bitirməkdə qərarlı olduqlarını söyləyib.

Qeyd edək ki, “Hizbullah” təşkilatı Qolan təpələrinə atılan raketlə hər hansı bir əlaqəni qətiyyətlə inkar edir.

Bu arada, Qolan təpələrinə son hücumdan sonra Livanda döyüşlərin intensivliyi qısa müddətə arta bilər, bununla belə, genişmiqyaslı müharibə olmayacaq. Bu barədə “Ynet” nəşri İsrailin yüksəkrütbəli rəsmilərinə istinadən məlumat yayıb.

“Bir neçə gün döyüş ola bilər. Söhbət indiyədək gördüyümüzdən fərqli olsa belə, məhdud zaman müddətindən gedir”, – deyə nəşr rəsmilərdən birinin sözlərindən sitat gətirib.