Hücuma keçən İsrail PUA-ları Dəməşq ətrafına 5 zərbə endirdi

İsrail Hərbi Hava Qüvvələrinə məxsus pilotsuz uçuş aparatları Suriyanın yeni hakimiyyət orqanlarının nəzarətində olan və Dəməşqin cənub-qərb ətraflarında asayişin bərpası əməliyyatında iştirak edən təhlükəsizlik qüvvələrinin bölmələrinə hücum edib.

Bu barədə Suriya mənbələrinə istinadən “Al Mayadeen” telekanalı məlumat yayıb.

Qeyd olunub ki, təhlükəsizlik qüvvələrinin cəmləşdiyi ərazilərə azı 5 zərbə endirilib.

Hücum rəsmilərin paytaxtın cənub-qərbindəki, druzların məskunlaşdığı Səhnaya qəsəbəsinə nəzarəti ələ keçirdiklərini və yerli silahlıları təqib etdiklərini açıqladıqdan sonra həyata keçirilib.

Dəməşqdəki tibbi mənbələr baş vermiş qarşıdurmalarda təhlükəsizlik qüvvələrinin ən azı 16 üzvünün öldürüldüyünü bildirib. Üsyançıların itkiləri isə 6 nəfərə çatıb. İsrail PUA-larının zərbəsi nəticəsində 1 suriyalı zabit həlak olub.

İsrail Müdafiə Qüvvələri hücumun Baş nazir Benyamin Netanyahu və müdafiə naziri İsrael Katsın əmri ilə reallaşdırıldığını açıqlayıb.