İdman bəzi xəstəliklərin irəliləməsini ləngidir

İdmanın Alzheimer xəstəliyinin irəliləməsinin qarşısını ala biləcəyi müəyyən edilib.

Çinli alimlərin araşdırmasında qeyd olunub ki, aktiv fiziki məşqlər beynin özünü zülal "tullantılarından" daha effektiv təmizləməsini stimullaşdırır.

"Məşqin Alzheimer xəstəliyi olan insanlar üçün faydalı olduğu artıq məlumdur. Lakin onun beyinə təsir mexanizmi tam öyrənilməmişdi. Təcrübələrimiz göstərir ki, idman əzələ hüceyrələri tərəfindən xüsusi mikrovezikulların istehsalını stimullaşdırır. Bu mikrovezikullar daha sonra beynin dəstəkləyici hüceyrələri olan mikroqliya tərəfindən mənimsənilir və onları beta-amiloid zülalını daha aktiv şəkildə parçalamağa təşviq edir", – deyə məqalədə qeyd olunub.

Qeyd edək ki, tədqiqat Alzheimerə meylli siçanlar üzərində aparılıb. Nəticələr göstərib ki, fiziki aktivlik demensiyanın bu formasının inkişafını əhəmiyyətli dərəcədə ləngidir.