II Qaregin barəsində məxfi məlumatlar toplanır

“Erməni Apostol Kilsəsi bütün ermənilərin katolikosuna sahib deyil. Orada, sadəcə, qanunsuz olaraq bu statusda oturan adam var”.

Bunu Ermənistanın Baş naziri Nikol Paşinyan jurnalistlərlə söhbət zamanı bildirib.

Onun sözlərinə görə, jurnalistlər Ktriç Nersisyan və onun yeparxiya başçısı olan qardaşı barədə həqiqətləri araşdırmağa can atmırlar.

“Ktriç Nersisyan nikahsızlıq barədə and içəndən sonra övlad sahibi olub. Bununla belə, Ermənistanda Ktriç Nersisyan bütün ermənilərin katolikosu ola bilərmi sualını verən yoxdur. Ktriç Nersisyan bütün ermənilərin katolikosu deyil”, – deyə Nikol Paşinyan bildirib.

Qeyd edək ki, Ermənistanın Baş naziri Ktriç Nersisyanı katolikos hesab etmir. Bu səbəbdən Paşinyan uzun müddətdir ki, Eçmiədzinin baş keşişinə Nersisyan deyə müraciət edir. Çünki Qaregin erməni kilsəsində titula görə verilən adlardandır. Nersisyanın sələfi I Qaregin adlanırdı.

Paşinyanın ona ailəli olması ilə bağlı ittihamları da əbəs yerə yaranmayıb. Belə ki, Eçmiədzində doğulan II Qaregin kilsə müxalifətinin yaradıcılarından sayılır. O da Paşinyanı müsəlmanlar kimi sünnət olmaqda günahlandırırdı. Həbs olunan Baqrat Qalstanyan və Mikael Acapahyan onun yaxın silahdaşlarıdır. Onlar Ermənistanda hakimiyyətin zorla dəyişdirilməsinə çağırış edir, nümayişlər keçirirdilər.

Sadəcə, iqtidarın vaxtında hərəkətə keçməsi kilsə-oliqarx-müxalifət koalisiyasının arzularını puç etdi. İndi isə əsas məqsəd 1999-cu ildən katolikosluq edən Nersisyanı kilsədən uzaqlaşdırmaqdır. Hazırda onun katolikosluqdan başqa hansı işlərlə məşğul olduğu barədə dəlillər toplanır.