İki bomba ilə dəqiq zərbə | Dronların idarə olunduğu məntəqə darmadağın edildi - Baku TV

Ukrayna Silahlı Qüvvələrinin “Su-27” qırıcı təyyarəsi Rusiya Ordusunun pilotsuz uçuş aparatlarının operatorlarının da yerləşdiyi komanda məntəqəsinə zərbə endirib.

Bu barədə Ukrayna Hərbi Hava Qüvvələrinin Oleksandr Dovxaç adına 39-cu Taktiki Aviasiya Briqadası məlumat verib.

Briqadanın açıqlamasına görə, Ukrayna hərbi aviasiyasının pilotu Rusiya qoşunlarının şəxsi heyətinin, o cümlədən dron operatorlarının yerləşdiyi idarəetmə məntəqəsini hədəfə alıb.

Məlumata görə, əməliyyat zamanı “Su-27”nin ekipajı iki idarəolunan aviasiya bombası tətbiq edib. Zərbənin dəqiq icra olunduğu və hədəfin məhv edildiyi bildirilib.

Ukrayna tərəfinin yaydığı məlumata əsasən, hücum nəticəsində komanda məntəqəsi tamamilə sıradan çıxarılıb.

Briqada həmçinin obyektin daxilində olan Rusiya hərbçilərinin zərərsizləşdirildiyini açıqlayıb. 39-cu Taktiki Aviasiya Briqadası əməliyyatın konkret olaraq harada həyata keçirildiyini və zərbənin hansı vaxtda endirildiyini açıqlamayıb.

Qeyd edək ki, Ukrayna və Rusiya arasında davam edən müharibədə pilotsuz uçuş aparatlarının tətbiqi və onların idarə olunduğu məntəqələrin məhv edilməsi tərəflərin əsas hədəflərindən biridir. Rusiya tərəfi isə bu hücumla bağlı hər hansı açıqlama verməyib.