İran bu məsələdə İsraili günahlandırdı | Yaxın Şərqdə humanitar vəziyyət daha da pisləşdi

İran Livanın İsraillə atəşkəsi təmin etmək üçün qəbul etdiyi istənilən qərarı dəstəkləyəcək və müharibəni sonlandırmaq üçün çalışacaq.

Bu barədə xarici media məlumat yayıb. İranın ali liderinin müşaviri Əli Laricani Beyruta səfəri zamanı şəhərin hücuma məruz qalması fonunda məsələ ilə bağlı açıqlama verib.

ABŞ-dən olan jurnalistin “sizin səfəriniz layihənin qəbuluna mane olmaq üçündür?” sualına iranlı müşavir “biz təxribata yol vermək niyyətində deyilik” sözləri ilə cavab verib.

Laricani “biz problemlərin həlli üçün çalışırıq. İstənilən halda Livan hökumətini dəstəkləyirik. Mübahisə yaradan Netanyahu və onun xalqıdır” sözləri ilə Təl-Əvivi günahlandırıb.

Məlumata görə, İsrail bu həftə Hizbullah-ın nəzarətində olan bölgələrə doğru hava hücumlarının miqyasını daha da artırıb. Bütün bunlar Vaşinqtonun vasitəçiliyi ilə baş tutan danışıqlar fonunda baş verir.

ABŞ-nin Livandakı səfiri ölkə parlamentinin spikeri Nəbih Berriyə atəşkəs təklifinə dair layihəni təqdim edib. Layihənin azı bir neçə həftəni əhatə edən atəşkəslə bağlı olduğu bildirilir.