İran mediası ölkəsini ifşa etdi

“Ermənistanla yanaşı, İran da Araz çayının ən böyük çirkləndiricisidir. Belə ki, İranda Süngün mis mədəninin fəaliyyəti bu çirklənməni artırır”.

Bu barədə İranın “Pəyam-e Ma” qəzetində məqalə dərc olunub. Araz çayının radioaktiv maddələr və ağır metallarla çirkləndirildiyi və bununla bağlı inkaredilməz faktların olduğu bildirilir.

Məlumata görə, əsas mənbəyi Ermənistandakı Metsamor Atom Elektrik Stansiyası olan bu çirklənmə Güney Azərbaycanda Araz çayının ətraf bölgələrində yaşayan sakinlər arasında müxtəlif ciddi xəstəliklərin yayılmasına, xüsusilə də qida borusu, mədə, qaraciyər və dəri xərçəngi xəstəliklərinin artmasına səbəb olub.

Qəzetin yazdığına görə, Ermənistandakı mis mədənləri də çirklənməyə səbəb olur. Eyni zamanda İranın Atom Enerjisi Təşkilatının və Energetika Nazirliyinin çaydakı radioaktiv çirklənməni araşdırmaması narahatlıq doğurub.

Məqalədə qeyd olunub ki, Araz çayının çirklənməsi ilə bağlı dövlət qurumlarının çoxsaylı hesabatlarına baxmayaraq, İran rəsmiləri çayda uranın olduğunu inkar edir.