İran parlamentinin spikeri İslamabad görüşü barədə danışdı - Baku TV

“İranın İslamabaddakı danışıqlarda irəli sürdüyü sülh təşəbbüslərinə baxmayaraq, Amerika tərəfi Tehranın etimadını qazana bilmədi”.

Bunu İslam Respublikası parlamentinin spikeri Məhəmməd Baqir Qalibaf “X” sosial şəbəkəsində yazıb.

“Danışıqlar başlamazdan əvvəl lazımi iradə və istəklərimizin olduğunu vurğuladım, amma əvvəlki iki müharibənin təcrübəsi səbəbindən qarşı tərəfə etibar etmirik. İran nümayəndə heyətindəki həmkarlarım perspektivli təşəbbüslər təklif etdilər, lakin Amerika tərəfi danışıqların bu mərhələsində etibarımızı qazana bilmədi. ABŞ bizim məntiq və prinsiplərimizi anladı və indi qərar verməlidir ki, etimadımızı qazana biləcək, ya yox.

Biz hər zaman diplomatiyanı, hərbi mübarizə ilə yanaşı, İran xalqının hüquqlarının təmin olunması üçün digər bir vasitə kimi qiymətləndiririk və İran xalqının 40 günlük milli müdafiə nailiyyətlərinin möhkəmləndirilməsi istiqamətində səylərimizi bir an belə dayandırmayacağıq”, – deyə o paylaşımında vurğulayıb.

Qalibaf dost və qardaş Pakistanın danışıqları asanlaşdırmaq səylərini də yüksək qiymətləndirib.