İran Prezidentindən konsulluğa hücumla bağlı ultimatum

“İsrailin İranın Dəməşqdəki konsulluğuna aviazərbələri cavabsız qalmayacaq”.

Bunu İran Prezidenti İbrahim Rəisi deyib.

Bildirib ki, konsulluğa raket hücumu nəticəsində briqada generalları olan Məhəmməd Rza Zahedi, Məhəmməd Hadi Hacı Rəhimi və digər 5 SEPAH üzvü həlak olub. İbrahim Rəisinin sözlərinə görə, İsrail bu cür hərəkətlərlə heç vaxt öz məqsədlərinə nail ola bilməyəcək.

Ölkənin xarici işlər naziri Hüseyn Əmir Abdullahian isə hadisəyə görə ABŞ-ni günahlandırıb və bunu beynəlxalq hüququn pozulması kimi qiymətləndirib. O qeyd edib ki, Dəməşqdəki hücumla əlaqədar İsveçrənin İrandakı səfirliyinin diplomatı Xarici İşlər Nazirliyinə çağırılıb və onun vasitəsilə “İsrail tərəfdarı ABŞ hökumətinə” mesaj ötürülüb. Bildirilib ki, rəsmi Vaşinqton bu hərəkətə görə məsuliyyətə cəlb olunmalıdır.

Suriyada baş verən hadisəyə rəsmi Moskvadan da reaksiya gecikməyib. Rusiyanın tələbi ilə sözügedən məsələ ilə bağlı aprelin 2-si Bakı vaxtı ilə 23:00-da BMT Təhlükəsizlik Şurasında iclas keçiriləcək.

İsrail Müdafiə Qüvvələri isə öz növbəsində zərbə ilə bağlı xəbərləri şərh etməkdən boyun qaçırıb. Bununla yanaşı, ölkə öz ərazisində, eləcə də bütün dünyada diplomatik nümayəndəliklərdə təhlükəsizlik tədbirlərini gücləndirilib.

Xatırladaq ki, aprelin 1-də İsrail Hərbi Hava Qüvvələrinin Dəməşqdə İran konsulluğunun binasını raket atəşinə tutması nəticəsində 13 nəfər həlak olub.