İran Rusiyaya ballistik raket göndərdi? | Avropa ölkələri hərəkətə keçir

Gün olmur ki, Rusiya-Ukrayna cəbhəsində gözlənilməz xəbərlərin şahidi olmayaq. Ukrayna tərəfi Avropa və ABŞ-dən aldığı silahlardan artıq Rusiya ərazisində istifadə etməyə başlayıb. Vəziyyətin qismən Ukraynanın lehinə dəyişdiyi bir vaxtda Kiyevə növbəti zərbə İrandan gəlib.

Belə ki, “The Times” nəşrinin iddiasına görə, Tehran Rusiyaya 112 kilometrlik məsafədəki hədəfi vurmağa imkan verən 200 ədəd “Fath-300” tipli ballistik raket göndərib, bununla da kifayətlənməyib 500 kilometrlik məsafədəki obyektlərin vurulmasını təmin edəcək silah-sursatın tədarükünü də nəzərdə tutur.

Rezonans doğuran xəbərin ardınca ABŞ, Böyük Britaniya və bir sıra Avropa ölkələri hərəkətə keçib. Böyük Britaniya tərəfi artıq Ukraynaya verdiyi “Storm Shadow” tipli raketlərdən Rusiya ərazisinə qarşı istifadə etməyə icazə verə biləcəklərini açıqlayıb.

ABŞ Prezidenti Co Bayden isə vəziyyəti daha da gərginləşdirəcək açıqlama verib. O bildirib ki, Rusiyaya qarşı uzaqmənzilli raketlərdən istifadə ilə bağlı məhdudiyyət aradan qaldırıla bilər.

Artıq beynəlxalq səviyyədə İran və Rusiyaya qarşı yeni sanksiyalar dalğası da başlayacaq. ABŞ bunun ilkin anonsunu da verib.

Bəs geniş əraziləri dağıdacaq gücə sahib bu raketlər Rusiya-Ukrayna arasındakı müharibənin gedişatına necə təsir edəcək?