İran siyasətinin ən qapalı fiqurlarından biri | Yeni Ali Lider haqqında - Baku TV

İranın yeni seçilən Ali Lideri Müctəba Xamenei vəzifə səlahiyyətlərinin icrasına başlayıb.

O, 1969-cu ildə Məşhəddə anadan olub. Qum şəhərində dini təhsil alıb, şiə ilahiyyatı üzrə klassik hövzə sistemində yetişib. Onun ilk müəllimləri arasında atası Əli Xamenei də olub.

O, uzun illərdir atasının yerinə keçəcək ən iddialı namizədlərdən biri hesab olunurdu. Müctəba SEPAH liderləri arasında böyük nüfuza malikdir. İran siyasi sistemində rəsmi dövlət vəzifəsi tutmasa da, uzun illər ölkənin siyasi və təhlükəsizlik strukturlarına təsir edən fiqurdur.

Müctəba Xamenei bir vaxtlar sabiq İran prezidenti Mahmud Əhmədinejada yaxınlığı ilə seçilib, 2005 və 2009-cu il prezident seçkilərində onu dəstəkləyib. 2009-cu ilin iyununda baş verən "Yaşıl hərəkat" zamanı hökumət əleyhinə nümayişçilərə qarşı repressiyaların təşkilində onun əsas fiqur rolunu oynadığı güman edilir.

Müctəba Xamenei ictimaiyyət qarşısında nadir hallarda görünür və mediada çox az çıxış edir. Onun şəxsi həyatı və fəaliyyəti barədə məlumatlar məhduddur, buna görə də o, İran siyasətində ən qapalı fiqurlardan biri hesab olunur.