İran və ABŞ arasında əldə olunan anlaşmanın regional təsirləri - Baku TV

“ABŞ və İran arasında əldə olunan anlaşma memorandumunun mətni ən geci iyunun 19-dək açıqlanacaq”.

Bunu ABŞ-nin vitse-prezidenti Cey Di Vens deyib.

Onun sözlərinə görə, Vaşinqton sənədin mətnini açıqlamaq niyyətindədir. Amma pakistanlı və qətərli vasitəçilər ABŞ-dən hələlik memorandumun bütün maddələrini ictimailəşdirməməyi xahiş edib.

O bildirib ki, razılaşma Hörmüz boğazının dərhal açılmasını təmin edəcək.

“Bundan başqa, razılaşma bizə konkret çərçivə verir. Bu çərçivədə İranın terrorizmi maliyyələşdirməsinin dayandırılması, nüvə silahından imtina etməsi təmin olunur. Nəticədə onlar dünya iqtisadiyyatına qoşulacaq. Mən iqtisadi faydalar dedikdə, sanksiyaların ləğv olunması haqqında danışıram”, – deyə Vens əlavə edib.

O, razılaşmada İranda yenidənqurma işlərinin aparılması üçün 300 milyard dolların verilməsi ilə bağlı maddənin olub-olmaması ilə bağlı məsələyə də münasibət bildirib.

Vitse-prezident qeyd edib ki, İran dünya ilə davranışını əsaslı şəkildə dəyişmədiyi müddət ərzində bu iqtisadi faydalardan bəhrələnə bilməyəcək.