İran və ABŞ arasında məxfi danışıqların pərdəarxası

İran Prezidenti Məsud Pezeşkian rəsmi Tehran ilə Vaşinqton arasında əldə olunmuş yeni anlaşma memorandumunu ölkə və region tarixi üçün "dönüş nöqtəsi" adlandırıb.

Dövlət başçısı bu barədə özünün rəsmi "X" sosial şəbəkə hesabında geniş bəyanatla çıxış edib.

Pezeşkian imzalanan sənədi "tarixi sənəd" kimi xarakterizə edərək bunun eyni zamanda qüdrətli və geri addım atmayan İran dövlətinin dünyaya növbəti bir mesajı olduğunu vurğulayıb.

Prezident qeyd edib ki, tərəflər arasında uzun müddətdir davam edən gərginlikdən sonra əldə olunan bu razılaşma qlobal sülhün və regional sabitliyin yalnız və yalnız qarşılıqlı hörmət kölgəsində mümkün ola biləcəyini bütün bəşəriyyətə nümayiş etdirdi.

İran Prezidenti bəyanatında rəsmi Tehranın xarici siyasət kursunun əsas prinsiplərinə də toxunub. O bildirib ki, İran İslam Respublikası öz milli şərəfini, dövlət müstəqilliyini və suverenlik prinsiplərini tam şəkildə qorumaq şərti ilə qlobal sülhün təmin olunmasına, regional əməkdaşlığın genişləndirilməsinə və iqtisadi-siyasi tərəqqiyə hər zaman sadiqdir və bundan sonra da bu xəttə sadiq qalacaq.

Mənbələr Pezeşkianın bu açıqlamasını İranda hakimiyyətə gələn islahatçı qanadın Qərblə münasibətləri normallaşdırmaq və ölkəni iqtisadi sanksiyalar qəfəsindən çıxarmaq istiqamətində atdığı ən ciddi və cəsarətli addımlardan biri kimi qiymətləndirirlər.

ABŞ və İran rəsmiləri arasında pərdəarxası aparılan diplomatik təmasların nəticəsi olan bu memorandumun yaxın gələcəkdə Yaxın Şərqdəki geosiyasi balansa necə təsir göstərəcəyi isə dünya mediasının əsas müzakirə mövzusuna çevrilib.