İrandakı hədəflərə PUA hücumu | Bəzi bölgələrə uçuşlar dayandırıldı

Sosial şəbəkələrdə və müxtəlif media resurslarında İranın bir neçə şəhərinin hücuma məruz qalması ilə bağlı məlumatlar yayılıb.

Belə ki, İsrailin Təbrizə də zərbələr endirdiyi və İranın hava hücumundan müdafiə qüvvələrinin şəhərdəki neft emalı zavodunun bir neçə kilometrliyindəki hədəfləri vurduğu iddia olunur.

İranın dövlət televiziyası isə İsfahan vilayətinin hava məkanında bir neçə kiçik pilotsuz təyyarənin məhv edildiyini bildirib. Məlumata görə, İsfahan şəhərində heç bir nüvə obyekti hədəfə alınmayıb.

İsfahanda baş verən partlayışlardan sonra Tehran, İsfahan, Şiraz və bu ölkənin qərb, şimal-qərb və cənub-qərb bölgələrinə bütün uçuşlar dayandırılıb.

İran mediasına görə, PUA və dronlar İraq Kürdüstanı ərazisindən İranın hava məkanına daxil olub. İsrailin artıq 9 hədəfə PUA və raketlərlə zərbə endirdiyi açıqlanıb.

“Fox News” ABŞ-dəki hərbi mənbəyə istinadən İsrailin İran ərazisinə zərbələrinin məhdud olduğunu bildirib.

CNN-in isə məlumatına görə, ABŞ İsrailin cavab tədbirini dəstəkləmir.