İrandan Trampa yeni təklif | "Yeganə seçim bölgəni tez tərk etməkdir…" - Baku TV

Ağ Ev rəhbəri Donald Tramp ABŞ nümayəndə heyətinin Pakistana səfərini ləğv etdikdən sonra İrandan yeni təklif aldıqlarını bildirib.

O bu barədə media nümayəndələri ilə söhbət zamanı məlumat verib.

“Maraqlısı odur ki, səfəri ləğv edən kimi dərhal, 10 dəqiqə ərzində danışıqlarla bağlı yeni sənədlər aldıq və onlar daha yaxşıdır”, – deyə Donald Tramp söyləyib.

Bu arada İslam İnqilabı Keşikçiləri Korpusu Amerika Birləşmiş Ştatlarına xəbərdarlıq edib. SEPAH bununla bağlı bəyanat yayıb.

“ABŞ və İsrail hərbçiləri İrana hər hansı yeni müdaxilə edərsə, şübhəsiz ki, gözləntiləri üstələyən cavabla qarşılaşacaq və bu, strateji çəkindirmə səviyyəsinə çatacaq”, – deyə bəyanatda bildirilib.

Əlavə edilib ki, İran Ordusu bütün təxribatlara hazırdır. İran Silahlı Qüvvələri düşmənin hücumlarının qarşısını ala bilər. O cümlədən SEPAH əməliyyat və müdafiə planlarını qiymətləndirib. Hərbi əsirlər üçün düşərgələr də hazırdır.

Bəyanatda vurğulanır ki, ABŞ və İsrail üçün yeganə yol və seçim insan və maddi-texniki resursların qalıqlarını toplayaraq bölgəni tez tərk etməkdir.