İsrail-HƏMAS müharibəsi dünyanın diqqətində

İsraillə HƏMAS arasında 14 gündür davam edən müharibə dünyanın diqqətindədir.

Müsəlman irqindən olan bir çox dövlətlər Fələstinə və Qəzza zolağında yaşayan sakinlərə dəstək nümayiş etdirsələr də, bəzi Qərb ölkələri İsrailin yanında olduğunu bildirir. İsrailə dəstək verən ölkələr arasında ABŞ, Böyük Britaniya, Almaniya, İtaliya və Fransa xüsusi yer tutur.

Bu dövlətlər hətta HƏMAS-a qarşı birgə bəyanat da qəbul edib. İsrailə koordinasiyalı dəstək vəd edərək HƏMAS-ın hücumunu pisləyiblər.

“Biz qarşıdakı günlərdə İsrailin özünü müdafiə edə bilməsini və Yaxın Şərq üçün sülh şəraiti yarada bilməsini təmin etmək niyyəti ilə müttəfiq dost ölkələr olaraq İsrailin yanındayıq”, – deyə bəyanatda deyilir.

Pentaqon isə bir müddət öncə Çin donanmasının Birləşmiş Ştatlara mümkün hücumundan qorunmaq üçün Təl-Əvivdən aldığı iki “Dəmir Qübbə”ni İsrailə hərbi dəstək kimi geri göndərir. ABŞ Administrasiyasının məlumatına görə, Birləşmiş Ştatlar bu sistemlərin sahibi olaraq qalacaq. İsrail isə onların icarə haqqını ödəyərək HƏMAS-ın raket zərbələrindən özünü müdafiə edə biləcək.