İsrail Hərbi Hava Qüvvələri İranın bir sıra nüvə hədəflərinə qarşı əməliyyat keçirdi

İsrail Hərbi Hava Qüvvələrinə məxsus təyyarələrin hücumundan sonra İranın paytaxtı Tehranda güclü partlayış səsləri eşidilib. Bu barədə “İRNA” agentliyi məlumat yayıb.

Eyni zamanda Tehranın imam Xomeyni adına hava limanı fəaliyyətini dayandırıb. Türkiyənin “Hüriyyət” qəzeti isə bildirib ki, İranın iki nüvə obyektində – Natanz və Fordoda partlayışlar baş verib.

İsrail hakimiyyəti İrana qarşı hərbi əməliyyata başladığını elan etdikdən sonra növbəti xəbərdarlığa qədər hava məkanını bağlayıb. Ölkədə Fövqəladə vəziyyət elan olunub. Baş nazir Benyamin Netanyahunun sözlərinə görə, əməliyyat lazım olduğu qədər davam edəcək.

İsrail Müdafiə Qüvvələri bildirib ki, nüvə hədəfləri də daxil olmaqla, onlarla hərbi obyektə zərbələr endirilib, bununla da birinci mərhələ tamamlanıb.

“Bu gün İran nüvə silahı əldə etməyə həmişəkindən daha yaxındır. İran rejiminin əlində olan kütləvi qırğın silahları İsrail dövləti və bütünlükdə dünya üçün ekzistensial təhlükədir. İsrail dövlətinin öz vətəndaşlarını müdafiə etmək öhdəliyini yerinə yetirməkdən başqa çarəsi yoxdur və keçmişdə etdiyimiz kimi, tələb olunan hər yerdə bunu davam etdirəcəyik”, – deyə məlumatda qeyd olunub.

ABŞ Prezidenti Donald Tramp isə İsrailin İrana hava zərbələrini müzakirə etmək üçün Nazirlər Kabinetinin iclasını çağırıb. Bu barədə CNN mənbələrə istinadən məlumat yayıb.