İsrail İrana gözlənilməz zərbə vuracaq

“İran uranın 90% zənginləşdirməsinin İsrailin zərbəsi ilə nəticələnəcəyini bilir”.

Bunu İsrailin adı açıqlanmayan yüksək vəzifəli rəsmisi “Israel Hayom”a açıqlamasında deyib.

Onun sözlərinə görə, İranın zənginləşdirilmiş uran ehtiyatları hazırda 2015-ci ildə müəyyən edilmiş limitdən 23 dəfə çoxdur: “ABŞ, eləcə də digər Qərb dövlətləri də yaxşı bilirlər ki, nüvə silahının istehsalı üçün lazım olan hədd, yəni 90% zənginləşdirilmiş uran İsrail üçün “qırmızı xətt”dir”.

İsrail rəsmisi onu da qeyd edib ki, ABŞ-nin İranla müqavilə bağlamaq üçün göstərdiyi nəzərəçarpan səylərinə baxmayaraq, çətin ki, uğur əldə edilsin, çünki İranın Ali Rəhbəri Əli Xamenei sövdələşməyə heç bir maraq göstərmir.

Qeyd edək ki, İsrail rəsmisinin bəyanatı İran və Qərb ölkələri arasında İranın nüvə proqramı ilə bağlı razılaşma potensialının olduğu bir vaxta təsadüf edir. İyunun 11-də ölkəsinin atom sənayesi nümayəndələri ilə görüşən Ə.Xamenei deyib ki, İran istəməsə, Qərb Tehranın nüvə silahı istehsalını dayandıra bilməz.