İsrail İranı müharibə ilə hədələdi: Bütün Ayətullahları yer üzündən siləcəyik

Rəsmi Təl-Əviv Tehranı müharibə ilə hədələyib.

Bu barədə oktyabrın 23-də İsrailin iqtisadiyyat naziri Nir Barkat “The Mail” nəşrinə verdiyi müsahibəsində deyib.

O bildirib ki, İranın dəstəklədiyi “Hizbullah” terror qruplaşması HƏMAS-a dəstək məqsədilə münaqişəyə qoşularsa, sonu yaxşı olmayacaq. Bunun cavabında İsrail İrana qarşı da hərbi əməliyyatlara başlayacaq.

“Livandakı terror təşkilatı “Hizbullah” İsrailə hücum edərsə, İrandakı bütün Ayətullahları yer üzündən siləcəyik və Tehranda ilanın başını əzəcəyik”, – deyə Nir Barkat öz müsahibəsində bildirib.

Nazir həmçinin İranı düşmən adlandırıb və əlavə edib ki, bu ölkə münaqişəni qızışdırmaqda, tərəflər arasında gərginliyin saxlanılmasında maraqlıdır.

Bənzər açıqlama ilə İsrailin xarici işlər naziri Eli Kohen də çıxış edib və bildirib ki, Tehran radikal HƏMAS hərəkatından və “Hizbullah” qruplaşmasından istifadə edərək, İsraili məhv etməyə, Yaxın Şərqi özündən asılı vəziyyətə salmağa çalışır.